Nazim Quliyevin məhkəməsində dava düşdü

Lent.az-ın məlumatına görə, hakim Azər Orucovun sədrliyi ilə keçirilən prosesdə cinayət işi üzrə zərərçəkmişlərlə müdafiə tərəfi arasında qalmaqal baş verib. Zərərçəkmiş qismində ifadə verən Natəvan Mehdiyeva N.Quliyevin ona hədə-qorxu gəldiyini söyləyib. O, müdafiə tərəfinin suallarını cavablandırarkən vəkilin verdiyi suallara etirazını bildirib. N.Quliyev isə məhkəmədən zərərçəkənin normal ifadə verməsini tələb edib. Bu zaman müdafiə tərəfi ilə zərərçəkən arasında mübahisə yaranıb. N.Mehdiyeva N.Quliyevin vəkilini onu müdafiə etdiyi üçün təhqir edib.

Daha sonra zərərçəkən qismində ifadə verən Səbirə Mahmudova ilə N.Quliyev arasında mübahisə yaranıb. Onlar bir-birilərini təhqir edib.

Məhkəməmə hər iki tərəfi prosesi pozmaqda ittiham edərək prosesi təxirə salıb.

İttihama görə, N. Quliyev Azərbaycan Respublikası Cinayət Məcəlləsinin 182.2-ci (hədə-qorxu ilə tələb etmə), 182.2.3-cü (hədə-qorxu ilə tələb etmə zor tətbiq etmə ilə törədildikdə), 182.3.2-ci (külli miqdarda əmlak əldə etmək məqsədi ilə törədildikdə), 221.1-ci (xuliqanlıq), 234.1-ci (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə təqsirləndirilir.

Qeyd edək ki, Nəsimi rayon Məhkəməsinin 20 may 2009-cu il tarixli hökmü ilə N. Quliyev Cinayət Məcəlləsinin 148-ci (təhqir) maddəsi üzrə təqsirli bilinərək 6 ay müddətinə azadlıqdan məhrum edilib. Cinayət Məcəlləsinin 147.2 (böhtan (ağır və ya xüsusilə ağır cinayətdə ittiham etməklə böhtan atma)) maddəsi üzrə isə ona bəraət verilib. Adıçəkilən məhkəmə prosesi “Azəri-Türk” Qadınlar Birliyinin sədri Tənzilə Rüstəmxanlı və Səbirə Mahmudovanın iddiası əsasında keçirilib.

Fərid Əkbərov