Əmisi qızına “ilişən” kişini qətlə yetirib

Bu barədə Lent.az-a Xəzər Rayon Prokurorluğundan məlumat verilib. Məlumatda bildirilib ki, avqustun 23-də Türkan qəsəbəsi sakini, 37 yaşlı Quliyev Ceyhun Baba oğlu qəsəbədə yerləşən məscidin yanında 27 yaşlı Məmmədov Eldar Zöhrab oğlu tərəfindən bıçaqla qətlə yetirilib.

Qətlin namus üstündə törədildiyi bildirilib. Belə ki, Ceyhun Quliyev E. Məmmədovun əmisi qızına qarşı seksual xarakterli zorakılıq hərəkətləri edib. Bundan xəbər tutan E.Məmmədov C. Quliyevi öldürmək qərarına gəlib. Türkan qəsəbəsində yerləşən məscidin yanında C.Quliyevi yaxalayan E.Məmmədov çoxsaylı bıçaq zərbələri endirib. C.Quliyev aldığı zərbələrdən yerindəcə keçinib.

Xəzər Rayon Polis İdarəsi əməkdaşlarının keçirdiyi əməliyyat axtarış tədbirləri nəticəsində qətli törədən Eldar Məmmədov yaxalanaraq istintaqa təhvil verilib.

Faktla bağlı Azərbaycan Respublikası Cinayət Məcəlləsinin 120-ci (qəsdən adam öldürmə) maddəsi ilə cinayət işi açılıb, araşdırma aparılır.

Fərid Əkbərov