Yaraqlılarla əlaqədə şübhəli bilinən dünya çempionu həbs olundu

Taekvondo üzrə 2003-cü il dünya çempionatının qalibi Kazimir Budunov saxlanılıb. Lent.az-ın məlumatına görə, bu barədə “Kafkazskiy uzel”ə 27 yaşlı idmançının vəkili açıqlama verib.

Hadisə Rusiyanın Dağıstan Respublikasındakı Şamilkala yaşayış məntəqəsində baş verib. Kazimir əmioğluları Hümbət və Məhəmmədlə birgə “BMW” markalı avtomobillə hərəkət edərkən, Mahaçqala şəhərinin Kirov rayon daxili işlər idarəsinin əməkdaşları tərəfindən ələ keçirilib. Lombardda çalışan Budunov hiylə ilə saxlanılıb. Onun mobil telefonuna zəng edərək, “Priora” avtomobilini girov qoymaq istədiklərini bildiriblər. Maşına qiymət qoyması üçün idmançını lombarda çağırıblar. Həmin məkanda isə Kirov polis idarəsinin cinayət-axtarış bölməsinin mülki geyimli əməkdaşları onu şöbəyə aparıblar.

Vəkil bildirib ki, Budunov rəsmi sənədləşdirilmə aparılmadan 3 gün bölmədə saxlanılıb. Sonra isə onun alış öncəsi sınaqdan çıxarmaq üçün Mahaçqala sakinindən aldığı avtomobildə guya 11 qram narkotik maddə tapıldığını bildiriblər. Amma hələ idmançıya qarşı heç bir ittiham irəli sürülməyib. Amma o, yaraqlılarla əlaqədə şübhəli bilinir.