Sankt-Peterburqda Məmməd üçün pul toplamağa başladılar

Qan xərçəng xəstəliyi diaqnozu qoyulmuş Azərbaycan vətəndaşı Məmməd Məmmədovun müalicəsi üçün Sankt-Peterburqda pul toplanır.

Lent.az-ın Rusiya mətbuatına istinadən verdiyi məlumata görə, Məmməd Sankt-Peterburqda Svetlana Zaqrutdinova ilə tanış olub və ailə qurub.

Cütlüyün niyyəti evləndikdən sonra Azərbaycana qayıtmaq olub, lakin Məmmədə adi boğaz ağrısı və qulaqda güclü ağrıların başlaması, daha sonra həkimlərin ona qan xərçəngi diaqnozu qoyması bu niyyətin gerçəkləşməsinə mane olub.

Indi məlum olub ki, 28 yaşlı Məmmədi yalnız sümük iliyi köçürməklə xilas etmək olar. Əks halda, onu ölüm gözləyir. Məmməd Azərbaycana gedib, müalicə kursu keçsə də, faydasız olub. Atası oğlunun müalicəsi üçün hər şeyini satıb, ancaq Azərbaycan həkimləri bu xəstəliyin müalicəsində gücsüz olduqlarını etiraf ediblər. Əməliyyatı yalnız Rusiyada etmək mümkündür. Rusiyada isə xaricilər üçün müalicə pulludur və Məmmədə 120 min dollar lazımdır.

İndi yüzlərlə Sankt-Peterburq sakini soydaşımızın müalicəsi üçün pul toplayır. Məmməd üçün yardım kampaniyasını “AdVita” Xeyriyyə Fondu keçirir. Artıq Almaniyada donor da tapılıb.