İnquşetiyada polisə hücum: ölən və yaralananlar var

İnquşetiyanın Nazran rayonunda Yol-Patrul Xidmətinin blok-postuna hücumdan sonra antiterror əməliyyatı rejimi tətbiq edilib.

APA-nın “RT”-yə istinadən verdiyi xəbərə görə, bu barədə Milli antiterror Komitəsinin qərargahının nümayəndəsi bildirib.

Nazran rayonunun Yandare yaşayış məntəqəsində terrorçu-kamikadze özünü Yol-Patrul Xidmətinin blok-postunda partladıb. Hadisə nəticəsində üç polis əməkdaşı yaralanıb, onlardan biri xəstəxanada keçinib.

Son məlumatlara görə, blok-posta hücumda 4 nəfər iştirak edib. Onlardan biri özünü partladıb, daha biri polis tərəfindən məhv edilib. Hazırda daha iki silahlının zərərsizləşdirilməsi istiqamətində əməliyyat-axtarış tədbirləri həyata keçirilir.