Əhmədinejad: “Azərbaycan xalqı mənim qəlbimdədir"

Qafqaz Müsəlmanları İdarəsinin sədri Şeyxülislam Allahşükür Paşazadənin rəhbərliyi ilə Azərbaycan nümayəndə heyəti İranda səfərdədir.

APA-nın “AzərTAc”a istinadən verdiyi xəbərə görə, Azərbaycan-İran parlamentlərarası dostluq qrupu üzvlərinin də təmsil olunduğu nümayəndə heyəti prezident Mahmud Əhmədinejad ilə görüşüb.

Görüşdə Azərbaycan-İran münasibətlərinə dair səmərəli fikir mübadiləsi aparılıb. İran dövlətinin başçısına prezident İlham Əliyevin səmimi salamlarını çatdıran A.Paşazadə mehriban qarşılanmaya və yüksək qonaqpərvərliyə görə minnətdarlığını bildirib. Azərbaycanda bütün dinlərə ehtiram göstərildiyini qeyd edən Qafqaz Müsəlmanları İdarəsinin sədri deyib ki, ölkəmizdə məscid, pir və ziyarətgahların abadlaşdırılmasına, təmir və bərpasına dövlət tərəfindən yardımlar edilir. Son illər bu sahədə görülən işlərdən bəhs edən A.Paşazadə məlumat verib ki, bu günlərdə Şamaxı rayonundakı qədim Cümə məscid-kompleksi əsaslı bərpa və yenidənqurmadan sonra prezident İlham Əliyevin iştirakı ilə dindarların istifadəsinə verilib. Bundan əvvəl isə Qəbələ və Sumqayıt şəhərlərində yeni inşa edilmiş Cümə məscidlərinin açılışı olub.

İran prezidenti Mahmud Əhmədinejad onun da hərarətli və səmimi salamlarını Azərbaycan dövlətinin başçısına çatdırmasını A.Paşazadədən xahiş edib. M.Əhmədinejad bildirib ki, dinamik inkişafda olan Azərbaycan-İran münasibətləri tarixi köklərə söykənir və ölkələrimiz bir-birinə qırılmaz tellərlə sıx bağlıdır. Xalqlarımız və ölkələrimiz arasındakı bu bağlılıq münasibətlərin inkişafı müstəvisində getdikcə möhkəmlənir.

Xalqımızın yüksək keyfiyyətlərindən danışan İran prezidenti deyib: “Azərbaycan xalqı mənim qəlbimdədir, heç bir qüvvə onu ürəyimdən çıxara bilməz”.