Ukrayna Kremldə Putinə hücum edibmi? - Zelenskidən CAVAB

Ukrayna prezidenti Vladimir Zelenski Moskvanın ukraynalıların dronların köməyi ilə Vladimir Putinə hücum etməyə cəhd etməsi ilə bağlı ittihamlarına münasibət bildirib.

Lent.az-ın xarici mətbuata istinadla xəbərinə görə, Şimali Avropa ölkələrinin sammitində mətbuat konfransı zamanı Zelenski bildirib ki, Ukraynanın bu qədər uzaq məsafələrdə istifadə etmək üçün kifayət qədər silahı yoxdur.

“Biz nə Putinə, nə də Moskvaya hücum etmirik. Biz öz ərazimizdə döyüşürük. Biz kəndlərimizi, şəhərlərimizi qoruyuruq. Hətta bunun üçün kifayət qədər silahımız yoxdur, ona görə də onlardan heç bir yerdə istifadə etmirik. Ona görə də bizdə çatışmazlıq var. Ona görə də biz Putinə hücum etməmişik. Bunu tribunalın ixtiyarına buraxaq”, - o bildirib.

Ölkəsinin lideri əlavə edib ki, Kreml Ukraynanı dronlarla “hücum etməkdə” ittiham edib, çünki Rusiya silahlı qüvvələrinin cəbhədə heç bir qələbəsi yoxdur. Zelenski aydınlaşdırıb ki, Putin sadəcə olaraq cəbhədə ölmək üçün əsgər göndərə bilmir və ona görə də ordusu üçün motivasiya lazımdır. Buna baxmayaraq, Putin artıq uduzduğunu vurğulayıb.