Koalaları VƏHŞİCƏSİNƏ GÜLLƏLƏDİLƏR – Baş nazir edib

Avstraliyanın Viktoriya ştatında Budj Bim Milli Parkında 2025-ci ilin mart ayında baş verən meşə yanğınlarından sonra, təxminən 700 koala vertolyotdan atəş açılaraq öldürülüb.

Lent.az xarici mediaya istinadən xəbər verir ki, bu tədbir, yanğın nəticəsində yaralanmış və aclıqdan əziyyət çəkən koalaların əzabını azaltmaq məqsədilə həyata keçirilib. Lakin bu qərar, heyvan hüquqları müdafiəçiləri və ictimaiyyət tərəfindən ciddi tənqidlərə səbəb olub.

Viktoriya ştatının baş naziri Jacinta Allan, hökumətin bu qərarı "çətin, lakin zəruri" adlandırıb və qeyd edib ki, bu addım geniş qiymətləndirmələrdən sonra atılıb. Lakin heyvan hüquqları müdafiəçiləri, vertolyotdan atəş açmaqla koalaların sağlamlıq vəziyyətinin düzgün qiymətləndirilə bilmədiyini və bu metodun qeyri-insani olduğunu bildiriblər.

Koala Alliance təşkilatının prezidenti Jess Robertson, vertolyotdan atəş açan snayperlərin koalaların sağlamlıq vəziyyətini və onların balalarının olub-olmadığını müəyyən edə bilmədiklərini qeyd edib. Bu səbəbdən, bu tədbirin yeganə düzgün qərar olmadığını vurğulayıb.

Qeyd edək ki, 2022-ci ildə koalalar nəsli kəsilməkdə olan heyvanlar siyahısına daxil edilib. Onların populyasiyasının sürətlə azalması, yaşayış mühitlərinin məhv olması və tez-tez baş verən meşə yanğınları ilə əlaqələndirilir.

Heyvan hüquqları müdafiəçiləri və ictimaiyyət nümayəndələri, bu cür tədbirlərin əvəzinə koalaların xilas edilməsi və onların təbii yaşayış mühitinin qorunması üçün daha humanist və effektiv yolların araşdırılmasını tələb edirlər.