İranda həbsxanada qiyam: ölən və yaralananlar var

İran paytaxtının şimal-qərbində yerləşən Kərəc həbsxanasında baş verən iğtişaşlar zamanı bir məhbus ölüb, çox sayda məhbus yaralanıb.

Lent.az-ın “Anadolu” agentliyinə istinadən verdiyi xəbərə görə, bu barədə İranın rəsmi xəbər agentliyi İRNA Əlborz vilayətinin baş prokuroru Hüseyn Fəzli Xerikəndinin bəyanatına istinadən məlumat yayıb.
Onun sözlərinə görə, Kərəc həbsxanasının narkotiklə ittihamı ilə məhkum olunmuş şəxslər saxlanan şöbəsində məhbuslar arasında toqquşma olub.
Prokuror bildirib ki, münaqişə zamanı bir nəfər ölüb, çox sayda məhbus müxtəlif dərəcəli bədən xəsarətləri alıb.

Xerikəndinin sözlərinə görə, təhlükəsizlik qüvvələrinin müdaxiləsindən sonra qarşıdurma dayanıb. Saxlanılan iki nəfər ağır vəziyyətdə xəstəxanaya çatdırılıb.

Norveçdə yerləşən İran İnsan Haqları Təşkilatı məhbusların üsyan etdiyini bildirib.
Təşkilatın məlumatına görə, administrasiya ölüm hökmü çıxarılmış məhkumu edam üçün başqa kameraya köçürdükdən sonra məhkumlar iğtişaş törədib.