Fırtınanı atışma zənn edən sakinlər polisə şikayət etdi

Ötən gecə Sankt-Peterburq sakinləri pis hava şəraitindən çox qorxublar.

Lent.az Rusiya mediasına istinadla bildirir ki, polisə partlayışlar və atışma xəbərləri ilə çoxsaylı zənglər daxil olub. Əslində isə həmin vaxt bölgədə tufan başlayıb.

Məlumata görə, Valor küçəsindəki bir evin sakini polisə zəng edərək “səmada parıltılar gördüyünü” deyib. Məkana göndərilən polislər, həqiqətən belə olduğunu, lakin onların tamamilə təbii mənşəli olduğunu müəyyən ediblər.

Bundan sonra Priozersky rayonunun Borisovo kəndinin sakini təhlükəsizlik qüvvələrinə yerli neft kəməri ərazisində “alovlanma” barədə məlumat verib. Şəhər tipli Drujnaya Qorka qəsəbəsindən olan bir vətəndaş polisə “yanıb-sönmə” barədə məlumat verib. Syaskelevo sakini polisə gecə səmasının hər iki dəqiqədən bir işıqlandığını söyləyib.

Yerli media yazır ki, “Qatçina bölgəsinin sakinləri həmin gecənin ən pisi olublar”. Onlar polisə “şübhəli səssiz parıltılar” haqqında ondan çox mesaj göndəriblər. Luqadan da müraciət edənlər olub.