Bu da Suriya müxalifəti: əsirlər belə qətlə yetirilir - VİDEO

Lent.az-ın Fransanın “La Fiqaro” qəzetinə istinadən verdiyi xəbərə görə, Suriya Azadlıq Ordusu (SAO) tərəfindən bütün dünyaya yayılan bu video-görüntülərdə alt paltarda, üz-gözü şişmiş halda olan 4 nəfər görünür.

Onları divar boyu düzüb güllələyirlər. Öldürülənlərin hamısı Berri tayfasının üzvləridir, tayfa başçısı Zeyni Berri də onların arasındadır.

Müxaliflər Berri tayfasını bir sıra cinayətlərdə, o cümlədən narkotik alverində ittiham ediblər. SAO-dan yayılan məlumata görə, hakim Əsəd rejiminə yaxın olan Berri tayfasının nəzarətində 5 minədək silahlı muzdlu var. Ötən ilin yazında Berri tayfası müxalifətin əleyhdarı kimi tanınsa da, sonradan onlarla atəşkəs barədə razılaşma əldə edib. Amma sonradan yenidən müxalif qüvvələrə qarşı çıxaraq onlara qarşı vuruşub.

Tanınmış insan hüquqları müdafiə təşkilatları bu cür edamların təkrarlanacağından narahatdır. “Human Rights Watch”-ın Yaxın Şərq üzrə təmsilçisi Nadim Huri baş verənləri hərbi cinayət sayıb. Huri SAO-nu hərbi əsirlərlə Cenevrə Konvensiyasının tələblərinə uyğun hərəkət etməyə çağırıb. Bundan sonra Berri tayfasının üzvlərinin qisasa başlayacağı istisna edilmir.

Bu edam Bəşər Əsəd rejimini dəstəkləyən qüvvələrə də haqlı olaraq Suriya müxalifətinin vəhşiliyini pisləməyə imkan verib. Məsələn, Rusiya xarici işlər nazirinin müavini Gennadi Qatilov bu faktın hər iki tərəfin insan haqlarını pozduğunu göstərdiyini, qərb və ərəb siyasətçilərinin məsələyə bu tərəfdən də baxmalı olduqlarını vurğulayıb.