Mübarəkin övladları dalaşıblar...

Davamlı kütləvi aksiyalardan sonra istefa verən 82 yaşlı Misir prezidenti Hüsnü Mübarəkin oğlanları dalaşıblar. Lent.az-ın “Al-Akbar” qəzetinə istinadən verdiyi məlumata görə, olay keçən həftənin cümə axşamı Hüsnü Mübarəkin səlahiyyətlərini vitse-prezident Ömər Süleymana təhvil verməsi, ancaq prezident postunda qalacağı ilə bağlı verdiyi bəyanatın mətni yazılan zamanı baş verib.

Hüsnü Mübarəkin böyük oğlu Alaa Mübarək kiçik qardaşı Camal Mübarəki biznesmenlərə yaltaqlanaraq siyasətə cəlb etməkdə və son nəticədə atasının devrilməsinə səbəb olmaqda günahlandırıb: “Sən dostlarına bu yolu açmaqla ölkəni dağıtdın, bu da onun nəticəsidir. Atam son ili şərəflə başa vuracaqdı, sən onun imicinin dağıdılmasına kömək etdin”.

“Al-Akbar” qəzetinin yazdığına görə, Qahirədəki Prezident Sarayında Hüsnü Mübarəkin övladlarının əlbəyaxa olmasının qarşısını almaq üçün yüksək vəzifəli şəxslər araya girməli olublar.