Amerika Ayın səthini bombalayacaq!

Güllədən sürətli hərəkət edən iki “Kentavr” raketi Ay səthində dərin deşik açacaq

Amerika Milli Aerokosmik Agentliyi – NASA-nın mütəxəssisləri su tapmaq ümidi ilə Ay səthində dərin bir dəlik açacaqlar.

lent.az-ın türkiyə mediasına istinadən məlumatına görə, yaxın aylarda Ay Kraterini Müşahidə Peyki (LCROSS) buraxmağa hazırlaşan NASA mütəxəssisləri bildiriblər ki, məqsəd bu peykdən atılacaq raketin yaradacağı dağıntı vasitəsilə Ay səthində su izinə rastlaşmaqdır.

Alimlər ümid edirlər ki, raketin yaradacağı dağıntı nəticəsində Ay səthindən 10 kilometr yüksəklikdə toz buludu əmələ gətirib, buxarlanmış qaz və su molekullarını görə bilərlər.

Araşdırmalar uğurla nətixələnsə, Ayda son dərəcə əhəmiyyətli bir tapıntı əldə edilmiş olacaq. Ay səthinin əksər hissəsinin quru olduğunu deyən alimlər bildirirlər ki, çuxurlarda, günəş işığı düşməyən yerlərdə buz kütlələrinin olması mümkündür.

LCROSS Ay səthindəki partlayışı gerçəkləşdirmək üçün oraya güllədən daha sürətli hərəkət edən iki “Kentavr” raketi buraxacaq.