Əhməd Zakayev Polşada həbs edilib

Lent.az-ın “France Presse” agentliyinə istinadən verdiyi məlumata görə, o, Polşada keçirilən Ümumdünya çeçen Konqresində iştirak etmək üçün bu ölkəyə gəlibmiş.

Polşa televiziyası bildirir ki, Varşava polisi Zakayev Polşa prokurorluğuna gedən zaman onu tutub. O, prokurorluq orqanlarından hansı səbəb axtarıldığını soruşmaq istəyirmiş. Həbsdən sonra Zakayevi prokurorluğa aparıblar.

Qeyd edək ki, Rusiya Əhməd Zakayevin barəsində İnterpol vasitəsilə axtarış elan edib. Moskva onun tutulması ilə bağlı Varşavaya ayrıca olaraq müraciət də göndərib. Polşa tərəfi Zakayevin beynəlxalq order əsasında həbs oluna biləcəyini vurğulamışdı. Amma onun Rusiyaya ekstradisiyası məsələsi açıq qalır.

Əhməd Zakayev Böyük Britaniyada yaşayır və bu ölkədən siyasi sığınacaq alıb. O, 2002-ci ildə Kopenhagendə həbs olunub. Amma Danimarka Rusiya Baş Prokurorluğunun təqdim etdiyi materialların kifayət qədər sübut olmadığı üçün Zakayevi Moskvaya verməkdən imtina edib.