“Telegraph” yazdı, Türkiyə qarışdı

İngiltərənin məşhur “Telegraph” qəzetində dərc olunan “İran Türkiyənin iqtidar partiyasına 25 milyon dollar bağışlayıb” başlıqlı məqalə Türkiyəni qarışdırıb.

Lent.az-ın Türkiyənin NTV telekanalına istinadən verdiyi məlumata görə, baş nazir Rəcəb Tayyib Ərdoğanın sədri olduğu hakim partiya “Telegraph”ın üzr istəməsini və yazının qəzetin internet saytından çıxarılmasını tələb edib.
AKP sədrinin müavini Ömer Çelikin yazılı açıqlamasında bildirilir ki, qəzetdə gedən bu xəbər çaşqınlıq yaradıb: “Belə bir məsələ olmayıb və xəbərinizdəki iddialar heç bir sübuta əsaslanmır. Bu yalan xəbəri qəti rədd edirik və belə əsassız iddianın nədən qəzetdə işıq üzü görməsinə dair açıqlamanızı gözləyirik. O cümlədən təcili ictimaiyyətə ünvanlanan üzrünüzü gözləyir və məqalənin “Telegraph”ın internet saytından çıxarılmasını tələb edirik. Bu məsələ ilə bağlı milli və beynəlxalq məhkəmələrə müraciət etmək haqqımızı da saxlayırıq”.