İran dörd dəst S-300 qurğusu əldə edib

Rusiya istehsalı olan məşhur S-300 zenit raket qurğusunun İrana satılması ilə bağlı söz-söhbət bir neçə ildir ki, davam etməkdədir. BMT-nin Tehrana qarşı sonuncu qətnaməsindən sonra Moskva bu kompleksin İslam Respublikasına satılmayacağını qəti şəkildə bəyan etdi.

Lent.az-ın İran KİV-ə istinadən məlumatına görə, buna baxmayaraq, İslam Respublikası 4 belə kompleksi əldə edib. Mənbənin bildirdiyinə görə, onların ikisi Belarusdan alınıb. İkisinin mənbəyi haqda məlumat hələ ki yoxdur.

İran mətbuatının yazdığına görə, iranlı mühəndislər öz S-300-lərini yaratmaq istəyir. Qeyd edək ki, bu ilin aprelində Tehranda keçirilmiş hərbi parad zamanı, iranlı hərbçilərin fikrincə, “Rusiyanın S-300 raketinə uyğun” raketlər təqdim olunmuşdu.

Qısa arayış: S-300 zenit raket kompleksi orta radiusla 100 km-dək məsafədən 100 hədəfi izləyə bilir, 12-yə qədər hədəfi məhv etmək qabiliyyətinə malikdir.
Bu sistem 1979-cu ildə keçmiş SSRİ-nin silah arsenalına daxil edilib. Bu kompleks iri sənaye və dövlət obyektlərini kosmik-hava hücumundan qorumaq üçün təyin olunub.
S-300 6-75 km-lik məsafədə uçan təyyarələri, 6-40 km-likdəki qanadlı və ballistik raketləri məhv etmək qabiliyyətinə malikdir.

Onu da qeyd edək ki, sanksiyadan sora İranla hərbi-texniki sahədə əməkdaşlıqdan imtina edən Rusiyanın 11-13 milyard dollar ziyana düşəcəyi ehtimal olunur. 2001-ci ildən etibarən ruslar İranı silahla təchiz etməyə başlayıb. 25 milyard dollarlıq bu layihənin 25 ilə gerçəkləşdirilməsi nəzərdə tutulub.

S-300-lə bağlı 800 milyon dollarlıq müqavilə 2007-ci ilin payızında imzalanıb. Bu anlaşmanın icrasından imtina edəcəyi halda, Moskva cərimə olunaraq, Tehrana müqavilənin ümumi dəyərinin 10 faizini ödəməlidir.

Sədrəddin Soltan