İspaniya İsraillə Suriya arasında vasitəçilik edir

Bəşər Əsəd: “Təcrübə göstərir ki, bu günə qədər kimsə Türkiyənin vasitəçilikdə oynadığı rolu oynaya bilməyib”

İspaniyanın baş naziri Xose Luis Rodriges Zapatero İsraillə Suriya arasındakı müzakirələrin yenidən başlaması üçün vasitəçilik etdiklərini bildirib.

Lent.az-ın “trt.net.tr” saytının Azərbaycan versiyasına istinadən verdiyi məlumata görə, Xose Luis Zapatero ölkəsinə səfər edən Suriya prezidenti Bəşər Əsədlə görüşdən sonra keçirilən birgə mətbuat konfransında bunu açıqlayıb.

O, İsrailin humanitar yardım karvanına hücumundan sonra Qəzzaya yardım baxımından yeni bir dönəmin başladığını bildirib. İspaniyanın baş naziri İsrailin Qəzza mühasirəsini yumşaltmasını istədiklərini söyləyib və İspaniya, İtaliya və Fransa xarici işlər nazirləri vəziyyəti yerində görmək üçün bu ay içərisində Qəzzaya getməyi planlaşdırdıqlarını qeyd edib.
Suriya prezidenti Bəşər Əsəd də İsraillə dolayısı ilə aparılan danışıqlarda Türkiyənin rolundan söz açıb. O, Türkiyənin vasitəçi olaraq bu müzakirələrin irəliləməsində ciddi uğurlar əldə etdiyini deyib: “Bizim təcrübəmiz göstərir ki, bu günə qədər Türkiyənin oynadığı rolu kimsə oynamayıb. Türkiyə bölgəmizdə yerləşir və bütün detalları bilir”.