Hindistanda təyyarə qəzası: 160 ölü

Parça-parça olan təyyarədən sağ çıxan da var

Hindistanın cənubundakı Manqalor hava limanının enişə daxil olan hissəsində Dubay reysi ilə gələn “Air İndia” aviaşirkətinə məxsus “Boeing 737-800” təyyarəsi qəzaya uğrayıb.

Lent.az-ın yerli “NDTV”yə istinadən verdiyi məlumata görə, Karnataka ştatının daxili işlər naziri B.C.Aşarya hadisə nəticəsində təyyarədə olanların yalnız 6-7-sinin sağ qaldığını bildirib.

Qəza yerli vaxtla səhər saat 6:30 (Bakı vaxtı ilə saat 6:00) radələrində baş verib. Təyyarədə 160 sərnişin və 6 ekipaj üzvü yer alıb. Pilotlardan biri rusiyalı, digəri isə hindistanlı olub. İlkin məlumatlara görə, hadisəyə texniki qüsurlar səbəb olub. Təyyarənin mühərriklərindən biri yanıb və layner uçuş-eniş zolağına çırpılıb. Hava limanının təhlükəsizlik xidmətinin nümayəndəsi Rohit Katiyar isə təyyarənin eniş zamanı uçuş-eniş hüdudlarını keçdikdən sonra yanıb.

Hazırda qəza məkanında xilasedicilər çalışırlar.