ABŞ İngiltərə şirkətini cərimələdi

Atom-nüvə proqramı ilə bağlı BMT Təhlükəsizlik Şurasının qəbul etdiyi üç qətnaməyə bir sıra tanınmış şirkətlər hələ də məhəl qoymur. Lent.az-ın “Farsnyus”a istinadən məlumatında bildirilib ki, İrana üç “Boieng-747” tipli sərnişin təyyarəsi satdığı üçün ABŞ Britaniyanın aviaşirkətini 2 milyon dollar məbləğində cərimələyib.

“Bali” adlı bu şirkətin baş ofisi İngiltərədə yerləşir. Kolumbiya ştat məhkəməsi şirkəti 2007-2008-ci illərdə ABŞ-dan qanunsuz yolla üç “Boieng” çıxarmaqda ittiham edib. Pul cəriməsi ilə yanaşı “Bali” beş il Amerikadan güzəştli ixracatla məşğul ola bilməz.

Qeyd edək ki, Ağ Evin İslam Respublikasına qarşı tətbiq etdiyi sanksiyaya əsasən, İrana sərnişin təyyarəsi satmaq yasaqdır.

Xatırladaq ki, bu günlərdə İranın nəqliyyat naziri Həmid Bəhbəhani deyib ki, Rusiya istehsalı olan “Tu-154” tədricən başqaları ilə əvəzlənəcək. Nazir yeni təyyarə modelləri barədə açıqlama verməyib.

Bir müddət öncə isə prezident Mahmud Əhmədinijat “özümüzün bu sahədə çalışacaq yetərincə kadrımız var”-deyərək, İranın mülki aviasiya sahəsində çalışan xarici pilotların iki ay ərzində işdən çıxarılması haqda göstəriş vermişdi.

İran rəhbərliyi hesab edir ki, Rusiya istehsalı olan sərnişin təyyarələri istismar üçün təhlükəsiz deyil. 2009-cu ildə Rusiya təyyarələrində baş vermiş qəza nəticəsində 160 nəfər həlak olub, bu il isə 49 sərnişin yararlanıb.

RF də istehsal edilən “tupolev”lərin Qərb dövlətlərində istismarı yasaqlanıb. Buna səbəb kimi mütəxəssislər onların Avropa standartlarına uyğun gəlməməsini göstərirlər.

Sədrəddin Soltan