Misirdə ABŞ səfirliyinə hücum davam edir - FOTO

ABŞ-da çəkilən və Məhəmməd peyğəmbərin təhqir olunduğu iddia edilən filmdə bağlı Misirdə etiraz aksiyaları davam edir.

Lent.az-ın İTAR-TASS agentliyinə istinadən verdiyi məlumata görə, Qahirədə ABŞ səfirliyinə hücum çəkən və səfirliyə daxil olmaq istəyən kütlənin qarşısını almaq üçün hərbçilər və polis gözyaşardıcı qazdan istifadə etmək, havaya atəş açmaq məcburiyyətində qalıb.

Misir Daxili İşlər Nazirliyi 6 əməkdaşının xəsarət aldığını bildirib. Təhlükəsizlik qüvvələri kütləni Təhrir meydanı istiqamətdə uzaqlaşdırmağa çalışır. SNN isə təhlükəsizlik qüvvələri ilə toqquşmalar zamanı onlarla insanın xəsarət aldığı, qarşıdurmaların səfirlikdən 100 metr kənarda davam etdiyi barədə məlumat yayıb.

Bu arada ABŞ-ın Liviya sahillərinə iki döyüş gəmisi göndərdiyi məlum olub. ABŞ Müdafiə Nazirliyinin yaydığı məlumatda qeyd olunur ki, “Labun” gəmisi yaxın günlərdə Liviya sahillərində olacaq. “Makfol” gəmisi isə bir neçə gün sonra Liviya sahillərinə istiqamət alacaq. Həmin gəmilər “Tomaqavk” qanadlı raketləri ilə təchiz olunub. Pentaqon döyüş gəmilərini göndərməkdə məqsədin Benqazidəki konsulluğunun təhlükəsizliyini gücləndirmək olduğunu açıqlayıb. Dünən ABŞ-ın Benqazidəki konsulluğu yandırılıb, ABŞ-ın bu ölkədəki səfiri və 3 diplomatı həyatını itirib.