İngilis? Amerikan? İspan? Yoxsa?...

Qazaxıstanın “Atamura” nəşriyyatının çap etdiyi dərsliklərin birindəki test tapşırığı Rusiyada ciddi narahatlığa səbəb olub. Lent.az-ın Qazaxıstan KİV-ə istinadən verdiyi məlumata görə, 5-ci sinif üçün nəzərdə tutulmuş dərsliklərin birindəki test tapşırığında şagirdlərə belə bir sual ünvanlanıb: “Kosmosa ilk uçan Yuri Qaqarin hansı xalqın nümayəndəsi olub?”
Cavab variantları kimi isə amerikan, ingilis və ispan göstərilib. Qaqarin isə milliyyətcə rus olduğundan bu cavabların heç biri doğru deyil.
On minlərlə tirajla çap olunmuş kitabdakı bu səhv Rusiyada ciddi narahatlığa səbəb olub. Kitabı nəşr edən “Atamura” nəşriyyatının direktor müavini Qulbarşın Jarılqasimova bildirib ki, yaxın iki ildə düzəliş vermək mümkün olmayacaq. Çünki dərsliyin növbəti dəfə 2014-cü ildə nəşr olunması nəzərdə tutulub.