Qafqazda dinclik yoxdu

Şimali Qafqazda silah və partlayış səsləri ara vermir. İnquşetiyada avtomobil karvanına olan hücum zamanı 6 nəfərin öldürülməsi, 15 nəfərin yaralanması ilə nəticələnən terror aktından sonra digər Qafqaz respublikalarında da analoji hadisələr baş verib.

Lent.az-ın Rusiya KİV-ə istinadən verdiyi məlumata görə, bu gün Çeçenistanın paytaxtı Qroznıda iki partlayış olub. Əvvəlcə naməlum şəxslər şəhərin mərkəzindəki dayanacaqda quraşdırılmış bombanı işə salıblar. Nəticədə bir nəfər ölüb, bir neçə nəfər ağır vəziyyətdə xəstəxanaya çatdırılıb.

Şəhərin Boqdan Xmelnitski və Çukotski küçələrinin kəsişməsində isə prezident Kadırovun mühafizə xidmətinin əməkdaşlarının birinin idarə etdiyi “Toyota – Korolla” markalı avtomobil partladılıb. Polis zabiti həlak olub.

Dağıstanda Qafqaz federal avtomagistralında isə polis postu atəşə tutulub. Amma bu dəfə zərərçəkən olmayıb. Atəş açanlar aradan çıxa biliblər.

Kabardin-Balkar respublikasında isə yaraqlılarla hüquq-mühafizə orqanları işçiləri arasında atışma olub. Xasana qəsəbəsi yaxınlığındakı atışmada Hüseyn Quzuyev və Yuri Akubekov adlı iki yaraqlı öldürülüb. Qarşı tərəfdən yaralananlar var.