İranın 2013-cü ilin iyununda vurulacağı deyilir

Dünyada baş verən olaylar İslam Respublikasının yaddan çıxmasına səbəb olmur. Lent.az-ın «ZMAN.com»-a istinadən məlumatına görə, ABŞ və İsrail hökumətləri prezident Barak Obama və baş naziri Binyamin Netaniyahu arasında görüş təşkilinin hazırlığına başlayıb.

Mənbənin bildirdiyinə əsasən, Ağ Evin indiki yiyəsi rəsmi Təl-Əvivə boyun olub ki, sanksiyalar İslam Respublikasının şübhəli nüvə proqramını dayandırmasına təsir etməzsə, o zaman 2013-cü ilin iyununda ABŞ İrana qarşı hərbi güc tətbiq edəcək.

Bu məlumatı İsrailin «10-cu» televiziya kanalı da yayımlayıb. Mənbə bildirib ki, həmin görüş ya bu ilin sentyabrında, ya da oktyabrın əvvəlində Nyu-Yorkda, yaxud Vaşinqtonda gerçəkləşdiriləcək.

Barak Obamanın seçkiqabağı kampaniyasının baş strateqi Devid Akselrod da görüş keçiriləcəyini təsdiqləyib.

Pentaqonun başçısı Leon Panetta isə bildirib ki, İsrail İranı vurmaq üçün qərar qəbul etməyib: «Mən əvvəllər də demişəm, yenə təkrar edirəm. Hazırda İsrailin İrana hücum haqda qərar qəbul etməsinə inanmıram. Əlbəttə, onlar müstəqil dövlətdir və öz təhlükəsizlik maraqlarına uyğun qərar qəbul edə bilər. Ancaq mən belə bir qərarın qəbul edilməsinə əmin deyiləm».

İran məsələsi bağlı ABŞ-ın mövqeyindən danışan müdafiə naziri bildirib ki, Vaşinqton İslam Respublikası ilə bağlı problemin diplomatik yolla həllinə üstünlük verir.

Sədrəddin Soltan