Yay istisi gündəlik həyatda bir sıra narahatlıqlar yaradır. Ən çox rast gəlinən problemlərdən biri də saçların boyuna və üzə yapışaraq diskomfort yaratmasıdır. Xüsusilə isti havalarda düzgün seçilmiş saç düzümü həm rahatlıq təmin edir, həm də dəbli görünməyə kömək edir.
Lent.az bu saç düzümlərini təqdim edir:
Hamar və hündür at quyruğu
Yay aylarında ən rahat saç düzümlərindən biri saçların möhkəm şəkildə at quyruğu formasında toplanmasıdır. Bu düzüm boynu və üzü tam açıq saxlayır, beləliklə isti havada özünüzü daha rahat hiss edirsiniz.
Saçların səliqəli görünməsi üçün gel və ya saç spreyindən istifadə etmək olar. Bu, xırda tellərin dağılmasının qarşısını alır və saç düzümünü gün ərzində qoruyur.
Hündür topuz
Yayın ən sevilən saç düzümlərindən biri də hündür topuzdur. Saçlar başın yuxarı hissəsində toplandığı üçün boyun tam açıq qalır və hava daha yaxşı dövr edir.
Bu saç düzümü həm gündəlik istifadə, həm də istirahət və səyahət üçün ideal seçimdir. Topuzu həm tam hamar, həm də bir qədər sərbəst və təbii formada hazırlamaq mümkündür.
Hörüklər
Hörüklər uzun illərdir yay mövsümünün dəyişməz saç trendi olaraq qalır. Fransız hörüyü, boksçu hörüyü və ya tac formasında hörülən saçlar gün ərzində açılmır və saçların üzə tökülməsinin qarşısını alır.
Bu saç düzümləri xüsusilə aktiv həyat tərzi keçirənlər, səyahət edənlər və ya gün ərzində çox hərəkətdə olanlar üçün əlverişlidir.
Yarım yığılmış saçlar
Saçlarını tam toplamaq istəməyənlər üçün yarım yığılmış saç düzümü yaxşı alternativdir. Bu zaman saçın üst hissəsi yığılır, qalan hissəsi isə sərbəst qalır. Beləliklə, saç həm rahat olur, həm də təbii görünüşünü qoruyur.
Saç aksesuarları
Saç halqaları, tokalar və xüsusilə "krab" formalı saç sancaqları yay aylarında ən praktik aksesuarlardan sayılır. Onlar bir neçə saniyə ərzində saçları toplamağa imkan verir və mürəkkəb saç düzümünə ehtiyac qalmır. Bundan əlavə, bu aksesuarlar saçların üzə və boyuna yapışmasının qarşısını alaraq isti havalarda rahatlıq yaradır.
Bob kəsimi yenidən trenddədir
Qısa saç kəsimləri son illərin ən populyar gözəllik trendlərindən biri olaraq qalır. Onların arasında bob kəsimi xüsusi yer tutur. Bu saç modeli universallığı sayəsində hər mövsüm yenidən dəbə qayıdır.
Müasir bob kəsiminin müxtəlif variantları fərqli üz quruluşlarına və fərdi üslublara uyğunlaşdırıla bilir. Məhz buna görə də stilistlərin fikrincə, 2026-cı ilin yay mövsümündə bob kəsimi yenidən ən dəbli saç düzümlərindən biri olacaq.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
