Ailə münasibətləri nadir hallarda qəfil dağılır. Adətən etibar gündəlik vərdişlər və təkrarlanan səhvlər səbəbindən tədricən yox olur. Psixoloqların fikrincə, kişilər çox vaxt dialoqun əhəmiyyətini yetərincə qiymətləndirmirlər. Onlar işə daha çox vaxt ayırır, yaxınlıq və emosional ünsiyyəti isə arxa plana keçirirlər. Məhz bu, etibarın zəifləməsinə və münasibətlərdə məsafənin artmasına səbəb olur.
Lent.az xəbər verir ki, mütəxəssislərin fikrincə, sözlərin yerini sükut tutduqda, tərəflər arasında anlaşılmazlıq böyüyür və münasibətlərdə soyuqluq yaranır.
Psixoloqlar qeyd edirlər ki, bəzi kişilər maddi dəstəyin diqqət və qayğını əvəz etdiyini düşünür. Lakin qadınlar daha çox emosional iştirak, anlayış və yaxınlıq gözləyirlər.
Onların vurğuladığına görə, səmimi və açıq söhbətin olmaması zamanla partnyorları bir-birinə yadlaşdırır. Sevgi isə möhkəm əsasını itirir.
Digər ciddi səhvlərdən biri də xırda incikliklərin görməzdən gəlinməsidir. Bu incikliklər yığıldıqca münasibətdə istilik azalır, yerini soyuq davranış və uzaqlaşma tutur.
Bundan əlavə, hətta kiçik yalanlar belə etibarı sarsıdır. Çünki yalan partnyorun gözündə insanı yadlaşdırır və münasibətdə şübhə yaradır.
Psixoloqlar xəyanəti etibarın itirilməsinin ən ağır forması kimi qiymətləndirirlər. Lakin onlar qeyd edirlər ki, xəyanətə aparan yol adətən kiçik addımlarla başlayır, diqqətsizlik, laqeydlik, soyuqluq və ünsiyyətin zəifləməsi ilə.
Münasibətdə dəstəyin olmaması da ayrılığı daha da dərinləşdirir. İnsanlar bir müddət sonra özlərini “bir komanda” kimi hiss etmirlər.
Ekspertlərin fikrincə, maliyyə problemləri də etibara təsir edir. Xüsusilə gizli xərclər və açıqlanmayan pul məsələləri tərəflər arasında şübhə yarada bilər.
Psixoloqlar tövsiyə edirlər ki, ailə içində hətta xırda detallar belə müzakirə olunsun. Bu, yaxınlığı qorumağa və anlaşmanı gücləndirməyə kömək edir.
Etibarın sarsılmasının əsas səbəblərindən biri də tərəflərdən birinin özünü dəyərsiz və qiymətləndirilməmiş hiss etməsidir. Buna görə də hər iki tərəfin bir-birinin zəhmətini görməsi və bunu etiraf etməsi vacib sayılır.
Mütəxəssislər bildirirlər ki, ailə münaqişələrinin böyük hissəsi məhz etimadsızlıqla bağlı olur. Etibar itəndə isə ən kiçik mübahisə belə mübarizəyə çevrilir.
Psixoloqların sözlərinə görə, etibar illərlə qurulur, lakin çox qısa zamanda dağıla bilər. Buna görə də onu qorumaq üçün daim diqqətli olmaq lazımdır.
Eyni zamanda, münasibətdə hörmətin olmaması problemi daha da ağırlaşdırır. Çünki hörmət olmayan yerdə etibarın mövcudluğu mümkün deyil.
Ekspertlər hesab edirlər ki, nikahı qorumağın yeganə yolu dürüstlükdür. Bu, münasibətlərin əsas dayağıdır. Məhz buna görə psixoloqlar dialoqa daha çox önəm verilməsini tövsiyə edirlər. Səmimi ünsiyyət etibarı bərpa etməyə və münasibəti gücləndirməyə yardım edir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
