Qızlar tez ərə gedir...

Azərbaycanda yetkinlik yaşına çatmamış qızların ərə verilməsi halları artır

Son illər Azərbaycanda yetkinlik yaşına çatmamış qızların ərə verilməsi halları əhəmiyyətli şəkildə artıb. Bu isə yeni doğulmuş uşaqların qeydiyyatdan yayındırılması hallarının da artmasına təsir göstərir.

Lent.az-ın məlumatına görə, Dövlət Statistika Komitəsinin sədri Arif Vəliyev jurnalistlərə açıqlamasında belə deyib. Onun sözlərinə görə, yetkinlik yaşına çatmamış qızların ərə verilməsi qanunla qadağan edildiyindən belə ailələrdə doğulan uşaqlar dövlət qurumlarından gizlədilir.

Arif Vəliyev onu da deyib ki, azyaşlı qadınların doğduğu uşaqların arasında zəif və aşağı çəkili körpələr üstünlük təşkil edir. Onun sözlərinə görə, 18 yaşınadək ərə getmiş qızların dünyaya gətirdiyi uşaqlar zəif olduğundan onlar arasında ölüm halları da digərlərindən çoxdur.

Komitə sədri vurğulayıb ki, yetkinlik yaşına çatmamış qızların ərə verilməsi Azərbaycanın bütün regionlarında müşahidə olunur. Belə hallar daha çox cənub rayonlarında üstünlük təşkil edir.

Elxan SALAHOV