Bakıda ilaxır çərşənbə qeyd olunur

Bu gün Azərbaycan paytaxtında ilaxır çərşənbə münasibətilə tədbirlər keçirilib. APA-nın xəbərinə görə, bayram tədbirinə “Azneft” meydanından atlar və dəvələrdən ibarət karvanın hərəkətə başlaması ilə start verilib. Karvanla hərəkət edən milli geyimli oğlan və qızlar Suraxanı rayonu Atəşgah məbədindən od götürüblər. Musiqi sədaları altında Novruz personajlarının iştirakı ilə Heydər Əliyev Sarayı qarşısından keçən karvan daha sonra Qız Qalasına yaxınlaşıb. Qala üstündəki məşəl alovlandırılıb.

Saat 19.00-da ilaxır çərşənbə münasibətilə incəsənət ustalarının iştirakı ilə bayram konserti və atəşfəşanlıq keçiriləcək.

Qeyd edək ki, tədbirlər Bakı Şəhər İcra Hakimiyyəti tərəfindən təşkil olunub. İcra Hakimiyyəti dünən paytaxt sakinlərinə müraciət edərək onları konsertə və atəşfəşanlığı seyr etməyə dəvət edib.