Mətbuat Şurası bütün yazılı mediaya nəzarət etmək istəyir

Əflatun Amaşov: “Əks halda, media sahəsindəki problemlərin bir hissəsi həll edilməmiş qalacaq”

Azərbaycan Mətbuat Şurasının katibliyi və şikayətlər üzrə komissiyası 30 reket qəzetin adını müəyyənləşdirib. Yaxın vaxtlarda həmin qəzetlərin yeni siyahısı açıqlanacaq.

Lent.az-ın məlumatına görə, bu barədə şuranın sədri Əflatun Amaşov jurnalistlərə açıqlamasında bildirib. Onun sözlərinə görə, şura bu qəzetlərin fəaliyyətini dəfələrlə yoxlamalı, sonra siyahını elan etməlidir: “Biz istəmirik ki, qurunun oduna yaş da yansın. Ona görə də bu məsələdə bir az diqqətli olmağa çalışırıq. Şuranın reket qəzet kimi əvvəl elan etdiyi 36 qəzetin siyahısı isə bütün qurumlara göndərilib”.

Şura sədri bu yaxınlarda reketçiliklə məşğul olduqlarına görə həbs olunan bir neçə jurnalistin çalışdıqları qəzetlərin adının dəqiqləşdiyini deyib. Onun sözlərinə görə, həbs olunan reket jurnalistlər “Respublika qanunları”, “Dövlət qanunları”, “Qanun və gerçəklik” adlı qəzetlərdir. Araşdırmalar zamanı həmin qəzetlərin 2007-ci ildə qeydiyyatdan keçdiyi məlum olub. Amma bu qəzetlərin heç biri şuranın üzvü deyil.

Əflatun Amaşov xatırladıb ki, hazırda Mətbuat Şurasının 180 üzvü var. Amma Mətbuat Şurası ölkədə çıxan bütün yazılı informasiya vasitələrinə nəzarət etmək niyyətindədir. Onun sözlərinə görə, əks halda media sahəsindəki problemlərin bir hissəsi həll edilməmiş qalacaq: “Hələ bir müddət əvvəl “Respublika qanunları” qəzeti ilə bağlı Şuraya şikayət daxil olmuşdu. Ona görə də biz ölkədəki mətbəələrdən məcburi nüsxələri göndərdikləri ünvanların siyahısına şuranın da adının salınmasını xahiş etmişik. Bu yolla ölkədə çıxan qəzetlərin hər birinin necə fəaliyyət göstərdiyini bilmək istəyirik”.

Elxan SALAHOV