Pensiyalar bayrama qədər veriləcək

Səlim Müslümov: “Pensiya ödənişlərində heç bir problem gözlənilmir“

Prezidentin fərmanına uyğun olaraq, yanvar və fevral aylarında pensiyanın sığorta hissəsinin indeksləşdirilməsi ilə bağlı artımlar pensiyaçılara çatdırılıb. Mart ayında pensiyaçılar öz pensiyalarını vaxtında ala biləcəklər.

Lent.az-ın məlumatına görə, bu barədə Dövlət Sosial Müdafiə Fondunun sədri Səlim Müslümov martın 6-da keçirdiyi mətbuat konfransında bildirib. Fond sədri qeyd edib ki, hazırda Novruz bayramına qədər bütün pensiyaların pensiyaçılara çatdırılması üçün ciddi iş gedir.

Onun sözlərinə görə, bu ilin iki ayında Dövlət Sosial Müdafiə Fondunun gəlirləri məcburi dövlət sosial sığorta haqları üzrə 130 milyon manat olub. Bu isə proqnozlaşdırılandan təxminən 8,2 milyon manat çoxdur. Ötən ilin müvafiq dövrü ilə müqayisədə isə fonda daxil olan məcburi dövlət sosial sığorta haqları 18,2 milyon manat artıqdır.

“İlin əvvəlinə bizim təxminən 112,4 milyon manat sərbəst qalığımız var idi. Hazırda fondda 357,5 milyon manat vəsait var və bu, pensiya ödənişlərinin aparılması üçün yetərlidir. Ötən iki ay ərzində bizim xərclərimiz 274 milyon manat olub və pensiyaçılara heç bir borcumuz yoxdur və martın 1-ə bizim hesabımızda 83,5 milyon manat sərbəst qalığımız var. Hazırda vəsaitlərin toplanması prosesi gedir. Yəni pensiyaların vaxtlı-vaxtında ödənməsi üçün heç bir problem gözlənilmir” - deyə, Səlim Müslümov bildirib.

Elxan SALAHOV