“Dəhşətli tıxaclar var, donuruq, bazarlar bağlanıb” - AÇIQLAMA

Bu gecədən başlayaraq Moskvada yenidən güclü qar yağmağa başlayıb.

Lent.az-ın “İnterfaks” agentliyinə istinadən verdiyi məlumata görə, qarın hündürlüyü 20 santimetrə çatır.

Temperatur 0-2 dərəcəyə qədər aşağı düşüb, bu da yoların buz bağlamasına səbəb olub.

Məlumata görə, sinoptiklər yağıntının bu gecə dayanacağını proqnozlaşdırırlar. Ancaq yağan güclü qar artıq ciddi problemə yol açıb. Bu gün Moskvanın “Vnukovo” aeroportu bağlanıb. “Vnukovo” dan təyyarələrin uçuşuna və enişinə icazə verilmir. Hazırda aeroport əməkdaşları uçuş-eniş xətlərini qardan təmizləyirlər. “Vnukovo” aeroportunun nə vaxt açılacağı barədə məlumat verilmir. Moskvadakı “Şeremetevo” aeroportu isə planlı rejimdə işləyir. Aeroportda uçuş-eniş zolaqları mütəmadi təmizlənir, fasiləsiz duz əleyhinə reagentlər səpilir. “Domodedovo” aeroportundakı vəziyyətlə bağlı isə hələ məlumat daxil olmayıb.

Moskvanın mərkəzinə gedən bütün yollara isə nəhəng tıxaclar yaranıb. Məsələn, Leninqrad şosesində tıxac 20 kilometrə çatır, Minsk şosesində isə tıxac 10 kilometri keçib. Kalujsk və Şelkovsk şosesində də vəziyyət fərqli deyil.

Moskvada yaşayan soydaşımız Teymur Hüseynov Lent.az-a bildirib ki, güclü qar yağması və havanın çox soyuq olması səbəbindən şəhərdə hərəkət çətinləşib, dəhşətli tıxaclar əmələ gəlib. O, Moskva bazarlarında çalışan azərbaycanlıların da işə çıxmadıqlarını söyləyib.

“Azərbaycanlıların çalışdığı əksər bazarlar bağlıdır. Yollarda tıxac olduğundan, buz bağladığından satıcılar bazara mal daşıya bilmirlər. Sinoptiklər də ümidverici heç nə demirlər. Hələ ki evdə oturmuşuq”- deyə o, bildirib.

Ramiz