Dəniz kruizi Türkiyədə istirahətin ən maraqlı hissələrindən biri hesab olunur. Son illərdə ölkədə insanın təbiətlə təmas quraraq daxili tarazlığını bərpa etməsinə əsaslanan “Blue Mind” - “Mavi düşüncə” konsepsiyası daha da populyarlaşıb. Gərgin sağlamlıq proqramları əvəzinə su üzərində və sahil boyunca yaşanan təbii təcrübələrə üstünlük verilir. Dəniz gəzintiləri, səhər üzgüçülüyü, sahil boyunca sakit yürüşlər və yaxta səyahətləri insanın stressini azaltmağa, əhvalını və diqqətini yaxşılaşdırmağa kömək edə bilər.
Lent.az xəbər verir ki, Egey və Aralıq dənizləri boyunca minlərlə kilometr sahil xəttinə malik Türkiyə məşhur “Mavi kruiz” marşrutları ilə bu istirahət növü üçün ən uyğun istiqamətlərdən biridir. Yaxtalar sakit körfəzlərdən keçir, firuzəyi sularda dayanır və səyahətçilərə təbiətlə yenidən harmoniya qurmaq imkanı yaradır.
Egey mehinin başladığı yer: Çeşmə və Alaçatı
Türkiyənin qərb sahilləri üzrə səyahət İzmirdən başlayaraq şimaldan cənuba doğru davam edir. Yol boyunca fərqli təbiət mənzərələri, sahil şəhərləri və mədəni dayanacaqlar diqqət çəkir. Egey sahillərinin incisi adlandırılan İzmir yalnız yaxta marşrutları ilə deyil, zeytun və şərab yolları, zəngin mətbəxi və “MICHELIN” bələdçisinə daxil edilmiş restoranları ilə də məşhurdur. Bölgənin ən populyar istirahət məkanlarından biri olan Çeşmədə Ilıca, Aya Yorgi, Pırlanta, Boyalık körfəzləri və Eşşək adası yaxınlığında dayanmaq mümkündür. Yaxınlıqdakı Alaçatı isə dünyanın ən məşhur vindserfinq mərkəzlərindən biri sayılır.
Urla şəhərini də ziyarət etmək tövsiyə olunur. Buradakı restoranlarda yerli üzvi məhsullar, təzə dəniz məhsulları, ənənəvi Egey otları və bölgə şərablarını birləşdirən “tarladan süfrəyə” konsepsiyası təqdim olunur.
“Mavi kruiz”in vətəni: Bodrum
Marşrutun növbəti əsas dayanacağı Türkiyədə “Mavi kruiz” ənənəsinin yarandığı Bodrumdur. Kurort dəbdəbəli hotelləri, yüksək səviyyəli çimərlikləri, məşhur restoranları və Egey dənizinin ən gözəl yaxta marşrutları ilə seçilir. Ənənəvi türk yelkənli qayığı olan guletlə səyahət edənlər Gümüşlük, Bitez, Yalıkavak, Göltürkbükü körfəzlərini və Orak adasını kəşf edə bilərlər. Burada üzgüçülük, şnorkellə dalış və zəngin sualtı aləmlə tanışlıq üçün əlverişli imkanlar var. Səyahət Gökova körfəzinə qədər davam edir. Burada Maden körfəzi, İngilis limanı, Dovşan adası və Akyaka kimi sakit məkanlar yerləşir. Bodrum qalası və burada fəaliyyət göstərən Sualtı Arxeologiya Muzeyi, qədim dünyanın yeddi möcüzəsindən biri olan Halikarnas mavzoleyinin qalıqları da mütləq görülməli yerlər sırasındadır.
Badam bağları və qədim şəhərlər: Datçadan Marmarisə
Qədim zeytun və badam bağları ilə əhatə olunan Datça yarımadası ənənəvi memarlığı, daş döşənmiş dar küçələri və toxunulmamış sahilləri ilə diqqət çəkir. Dəniz səyahəti zamanı Palamutbükü, Hayıtbükü və Akvarium körfəzi kimi sakit məkanlara getmək mümkündür. Bu körfəzlər üzgüçülük, şnorkel və dayvinq üçün əlverişlidir. Daha sonra marşrut Marmarisə uzanır. Kumlubük, Serçe limanı, Sedir adası və Bördübet təbii gözəllik, sakitlik və aktiv istirahəti bir araya gətirir. Datçada Afrodita məbədi və dənizə panoramik mənzərəsi olan teatrı ilə məşhur Knidos qədim şəhərini, Marmarisdə isə bölgənin dənizçilik və arxeoloji tarixindən bəhs edən muzeyin yerləşdiyi qədim qalanı ziyarət etmək tövsiyə olunur.
Egey sahillərinin inciləri: Göcek və Fethiye
Muğla sahillərində “Mavi kruiz” Fethiye körfəzi olmadan tamamlanmış hesab edilmir. Körfəzin mərkəzi isə Türkiyənin ən nüfuzlu yaxta mərkəzlərindən biri olan Göcekdir. Buradan Göcek adası, Yassıca adaları, Bedri Rahmi körfəzi, Tersane adası və Boynuzbükü körfəzinə marşrutlar açılır. “Kleopatranın hamamları” kimi tanınan su altında qalmış xarabalıqlar üzgüçülük və şnorkel üçün fərqli təcrübə yaradır. Fethiye istiqamətində davam edən səyahət zamanı Katrancı körfəzi, dünyaca məşhur Ölüdəniz laqunu və sakit Kabak körfəzi ilə tanış olmaq mümkündür. Dalyan şəhəri, qaya məzarları ilə məşhur Kaunos qədim şəhəri və Aralıq dənizində Caretta caretta tısbağalarının ən mühüm yuvalama yerlərindən biri olan İztuzu çimərliyi də marşruta əlavə edilə bilər. Fethiyedə Ölüdəniz üzərində paraplanla uçuş da turistlərin ən çox seçdiyi fəaliyyətlərdəndir.
Firuzəyi final: Kaş və Kekova
“Mavi kruiz”in ideal final nöqtəsi Türkiyə Rivyerasının mərkəzi olan Antalyadır. Burada Aralıq dənizinin firuzəyi suları möhtəşəm təbiət mənzərələri və zəngin tarixi irslə birləşir. Ən məşhur marşrutlardan biri Kaş və Kekova arasında uzanır. Səyahət Limanağzı körfəzi, Güvercin adası, Aperlai, Tersane körfəzi, Üçağız və Kaleköydən keçir. Kristal təmiz sularda üzmək, sualtı aləmi və tarixi abidələri görmək bu marşrutu xüsusilə yaddaqalan edir. Kaş dünyanın aparıcı dayvinq istiqamətlərindən biri hesab olunur. Kekovada isə məşhur Batmış şəhərin üzərində kayakla üzərək bölgənin unikal arxeoloji irsini yaxından görmək mümkündür.
Aspendos qədim teatrı, Pataranın arxeoloji abidələri, “Mavi bayraq”la mükafatlandırılmış çimərliklər və Likiya yolunun mənzərəli hissələri də ziyarət üçün tövsiyə olunur. Səyahəti təzə dəniz məhsulları, mövsümi ərzaqlar və zəngin yerli mətbəx ənənələri ilə seçilən Aralıq dənizi yeməklərini dadmaqla tamamlamaq olar.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
