Şəxsi məlumatları internetdə çıxanlara xəbər veriləcək

Gələn ilin əvvəlindən başlayaraq "Google" şirkəti öz istifadəçilərinin konfidensial məlumatlarının internetdə ortaya çıxdıqları halda bu barədə onlara bildiriş göndərməyi planlaşdırır.

Lent.az technote.az istinadla bildirir ki, söhbət telefon nömrəsi, elektron poçt ünvanı, yaşayış ünvanı və s. kimi konfidensial məlumatlardan gedir. "Google" bu yeni imkanı "Results about you" adlı funksiyanın istifadəyə verilməsindən sonra anons edib. Qeyd etmək lazımdır ki, "Results about you" funksiyası vasitəsilə istifadəçilər "Google"dakı axtarış sorğularında özləri barəsində ortaya çıxan konfidensial məlumatların silinməsi üzrə şirkətə sorğu göndərə bilərlər. Bu funksiya ABŞ-dakı bəzi istifadəçilər üçün artıq istifadəyə verilib.

Şirkət təmsilçilərindən biri qeyd edib ki, anons olunmuş yeni funksiya çərçivəsində göndəriləcək bildirişlərin aktivləşdirilməsi könüllü şəkildə reallaşdırılacaq. Belə ki, insanların çoxu üçün bu funksiya mütəmadi istifadədə lazım deyil. Lakin buna baxmayaraq istifadəçilər üçün bu cür imkan təqdim ediləcək və onlar bu funksiya vasitəsilə özlərini internet mühitində qoruya biləcəklər. Təbii ki, istifadəyə veriləcək yeni funksiya çərçivəsində "Google" yalnız öz axtarış sistemindəki axtarış nəticələrində ortaya çıxan konfidensial istifadəçi məlumatlarını siləcək. Həmin məlumatların qeyd olunduqları veb səhifələrin silinməsi nəzərdə tutulmayıb. Belə ki, bu cür səhifələrin tapılması çətin məsələdir.

Gələn ilin əvvəlində istifadəyə veriləcək funksiya çərçivəsində istifadəçilər fərdi şəkildə öz konfidensial məlumatlarını axtarış sorğularında axtarmayacaqlar. Sistem bu və ya digər konfidensial məlumatın axtarış sorğularında ortaya çıxdığını təyin etdiyi zaman avtomatik şəkildə bu barədə istifadəçiyə xəbər verəcək. İstifadəçi isə öz növbəsində ortaya çıxan konfidensial məlumatların silinib-silinməməsi qərarını verəcək. "Google" artıq uzun müddətdir ki, konfidensial məlumatların axtarış nəticələrindən silinmələrinin tələb edilməsi imkanını təqdim edir. Şirkət həmçinin konfidensial məlumatların silinməsi üzrə sorğuların göndərilməsi və həmin məlumatların silinməsi proseslərini daha da sadələşdirib. Belə ki, "Results about you" funksiyası istifadəçilərə axtarış nəticələrindəki konfidensial məlumatlarını bir neçə kliklə işarələməyə imkan verir.