GPT-5 bu qədər enerji sərf edir – Dəhşətə gələcəksiniz

Mütəxəssislər hesab edirlər ki, “OpenAI”nin yeni süni intellekt modeli olan GPT-5-in qabaqcıl imkanları yüksək qiymətə malikdir və onun ümumi enerji istehlakı 1,5 milyon ABŞ evinin gündəlik elektrik ehtiyacına bərabərdir.

Lent.az xəbər verir ki, bu yaxınlarda “OpenAI” tərəfindən təqdim edilən yeni nəsil AI modeli olan GPT-5 təkcə qabaqcıl imkanları ilə deyil, həm də böyük enerji istehlakı ilə diqqəti cəlb edir.

Mütəxəssislərin fikrincə, yeni modelin enerji istehlakı süni intellektin ekoloji xərcləri ilə bağlı narahatlıqlar yaradır.

“Rhode Island” universitetinin tədqiqatçılarının təhlilinə görə, “ChatGPT”nin gündəlik 2,5 milyard sorğusu nəzərə alınmaqla, GPT-5-in ümumi enerji istehlakı ABŞ-da 1,5 milyon evin gündəlik elektrik ehtiyacını ödəyə bilər.

Bu, bir orta uzunluqlu cavabın enerji dəyərinə əsasən hesablanır ki, bu da bir lampanı 18 dəqiqə yandırmağa bərabərdir.

Bu həyəcanverici proqnozlara baxmayaraq, “OpenAI” 2020-ci ildə GPT-3-ü istifadəyə verdikdən sonra modellərinin enerji istehlakı ilə bağlı rəsmi məlumat yaymayıb.

Mütəxəssislər qeyd edirlər ki, modelin ölçüsü və mürəkkəbliyi ilə onun enerji sərfiyyatı arasında güclü mütənasiblik var və GPT-5-in resurs istehlakı sələflərindən dəfələrlə yüksək olmalıdır.