Bank kartınızın PIN-kodu belədirsə, təhlükədəsiniz

Bank kartları üçün ən çox seçilən PIN-kodlar həm də ən asan təxmin edilən kombinasiyalardır. Araşdırmada təhlil olunan kodların təxminən beşdə birini cəmi üç kombinasiya təşkil edib: 1234, 1111 və 0000.

Lent.az xarici mediaya istinadla xəbər verir ki, 3,4 milyon PIN-kodun təhlili insanların yadda saxlamaq üçün sadə rəqəm birləşmələrinə üstünlük verdiyini göstərib, lakin bu rahatlıq kartın təhlükəsizliyi üçün risk yaradır.

Dördrəqəmli PIN-kod üçün 10 min mümkün kombinasiya var. Buna baxmayaraq, araşdırmada 1234, 1111 və 0000 kodlarının ümumi payı təxminən 19 faiz olub. Dələduzlar şifrəni tapmağa çalışarkən ilk növbədə məhz belə geniş yayılmış variantları yoxlaya bilərlər.

Riskli kodlar yalnız bu üç kombinasiya ilə məhdudlaşmır. 4321 kimi ardıcıllıqlar, eyni rəqəmin təkrarlandığı şifrələr və klaviaturada sadə xətt yaradan 2580 kimi birləşmələr də asan təxmin edilir.

Doğum tarixini və ya doğum ilini PIN-kod seçmək də uğurlu həll sayılmır. Bu məlumatları bəzən sosial şəbəkələrdən və digər açıq mənbələrdən tapmaq mümkündür.

Mütəxəssislər şəxsi məlumatlarla əlaqəsi olmayan, aydın ardıcıllıq yaratmayan rəqəm birləşmələrini seçməyi məsləhət görürlər. Müxtəlif kartlar və xidmətlər üçün eyni PIN-koddan istifadə etmək də riski artırır. Bir kodun başqasının əlinə keçməsi digər kartları da təhlükə qarşısında qoya bilər.

PIN-kodu kartın üzərinə yazmaq və ya kartla birlikdə saxlamaq olmaz. Şifrəni başqa şəxslərlə bölüşmək, şübhəli zəng və mesajlara cavab olaraq bildirmək də təhlükəlidir.

Kartınızda ən çox istifadə olunan PIN-kodlardan biri varsa, onu daha çətin təxmin edilən kombinasiya ilə dəyişmək məsləhətdir.