Yol polisindən tıxacla bağlı valideynlərə İTTİHAM

Sentyabrın 29-dan etibarən orta məktəblərin yuxarı siniflərində tədris başlayır.

Bu səbəbdən paytaxtın mərkəzi küçələrində yola yaxın ərazilərdə yerləşən məktəblərin qarşısında sıxlıq yaranacağı ehtimal olunur. Yol polisinin keçirdiyi bu qədər təbliğat xarakterli tədbirlərə baxmayaraq, əksər valideynlər yenə süni tıxac yaradır və dayanma-durma qaydalarını pozur.

Bakı şəhər Dövlət Yol Polisi İdarəsinin şöbə rəisi, polis polkovniki Vaqif Əsədov mövzu ilə bağlı Lent.az-a danışarkən bildirib ki, yollara yaxın yerləşən məktəblərin qarşısındakı sıxlıq dayanma-durma tələblərini pozan sürücü valideynlərin hesabına yaranır.

Vaqif Əsədov

“Bildiyimiz kimi, sentyabrın 29-dan dərs ili tam olaraq başlayır. Sözsüz ki, bu səbəblə paytaxtın ümumi istfadədə olan yollarına bitişik məktəblərinin ətrafında süni sıxlıq yaranacaq. Bu da təbii ki, həmin ərazilərdə yerləşən məktəblərin qarşısında dayanma-durma qaydalarını pozan valideynlərin hesabına meydana gələcək. Ona görə əvvəlcədən valideynlərdən xahiş edirik, yollarda hərəkət intensivliyini aşağı salmamaq üçün dayanma-durma qaydalarına tam riayət etsinlər. Unutmayın ki, sizin 1 dəqiqəyə övladınızı məktəbə düşürməyiniz ləngimələr yaradır.

Sözsüz ki, təhlükəsizliyin təmin edilməsi üçün tərəfimizdən zəruri tədbirlər həyata keçirilir. Hərəkətin təşkil edilməsində, xüsusilə, yol kəsişmələrində, birləşmələrdə müfəttişlərimiz pik saatlarda xidmət edir, sürücülərə istiqaməti göstərir”.