Türkiyəli qonaqlar Bakı Ali Neft Məktəbində olublar

Türkiyənin “Mühəndislik Eğitim Proqramları Değerlendirme ve Akreditasyon Derneği” nin (MÜDEK) nümayəndə heyəti ilə Bakı Ali Neft məktəbində görüş keçirilib. Bu barədə Lent.az-a ali məktəbdən məlumat verilib. Qonaqları qəbul edən Bakı Ali Neft Məktəbinin rektoru Elmar Qasımov ali məktəbin yaranma tarixi, qısa zaman çərçivəsində əldə etdiyi uğurları, gələcək planları və perspektivləri haqqında qonaqlara ətraflı məlumat verib. E.Qasımov qeyd edib ki, Azərbaycan dünyada ilk neft çıxaran ölkədir. Bu gün də neft-qaz və kimya sənayesi ölkə iqtisadiyyatının inkişafında əsas rol oynayır. Bu baxımdan beynəlxalq standartlara cavab verən tədris metodları ilə savadlı mühəndis kadrların

yetişdirilməsi qarşıya qoyulmuş ən önəmli məsələlərdəndir.

Görüşdə iştirak edən MÜDEK-in idarə heyətinin rəhbəri Erbil Payzın bildirib ki, Azərbaycan və Türkiyə qardaş və dost dövlətlər olmaqla yanaşı, eyni zamanda bütün sahələrdə ən yaxın müttəfiq dövlətlərdir. O vurğulayıb ki, hər iki dövlət ölkələrimizlə bağlı istənilən məsələlərin həllində bərabər addım atır və hər hansı bir yaranmış maneənin aradan qaldırılması üçün bir-birinə dəstək olur.