Cari ilin 23 mart tarixində Pakistanın Ravalpindi şəhərində Azərbaycanın Pakistandakı Səfirliyinin dəstəyi ilə “The Diplomatic İnsight” jurnalı və Ravalpindi İncəsənət Mərkəzinin birgə təşkilatçılığı ilə Novruz bayramı tədbiri keçirilib.
Tədbirdə Pakistanın tanınmış ictimai-siyasi və mədəniyyət xadimləri, media nümayəndələri ilə yanaşı Türkiyə, İran, Şimali Kipr Türk Respublikası, Özbəkistan, Qırğızıstan, Türkmənistan, Tacikistan və Əfqanıstan səfirliklərinin nümayəndələri iştirak ediblər.
Mərasimdə ölkəmizdə Novruz bayramı zamanı bişirilən müxtəlif yeməklər və şirniyyat növləri tədbirə gələnlərə təqdim edilib, onlara bayramın Azərbaycan xalqının həmrəyliyində, ictimai həyatında və məişətində oynadığı rol haqqında ətraflı məlumat verilib.
Bildirilib ki, mərhəmət və birlik rəmzi olan qədim Novruz bayramı Azərbaycan xalqının zəngin mənəviyyat və humanizminin təzahürüdür. Səfirlik əməkdaşları qonaqlara ölkəmizdə qeyd olunan bayramlar, xalqımıza məxsus olan müxtəlif adət-ənənələr haqqında ətraflı məlumat verib, onların çoxsaylı suallarını cavablandırıb.
Qonaqlara həmçinin Azərbaycan həqiqətlərini, mədəniyyət və tarixini, erməni təcavüzünü, habelə həyatın müxtəlif sahələrində ölkəmizin əldə etdiyi inkişafı əks etdirən müxtəlif kitab, jurnal və videomateriallar hədiyyə olunub.
Tədbirə qatılanlar Azərbaycanda həqiqətən də Novruzun hərarətlə qeyd edilməsindən, bayramın Azərbaycan xalqının, bütövlükdə isə bölgə xalqlarının həyatında birləşdirici rolundan bəhs olunub.
Bayram mərasimi Pakistanın aparıcı telekanalları və mətbuat orqanları tərəfindən işıqlandırılıb.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
