Ombudsman Türkiyənin səfirini qəbul edib

Azərbaycan Respublikasının İnsan Hüquqları üzrə Müvəkkili Elmira Süleymanova Türkiyə Respublikasının ölkəmizdəki səfiri İsmayıl Alper Coşqunu qəbul edib. Bu barədə APA Ombudsman Aparatına istinadən məlumat verir.

Görüşdə Müvəkkil bu yaxınlarda Türkiyədə ilk Ombudsmanın seçilməsini əlamətdar hadisə kimi vurğulayıb. O, hüquqi dövlətin mühüm atributlarından olan Ombudsman təsisatının yaradılmasının Türkiyədə insan hüquqlarının daha səmərəli təmininə kömək edəcəyinə ümid bəslədiyini bildirib. E.Süleymanova səfirə fəaliyyətində uğurlar arzulayıb.

Müvəkkil insan hüquqları sahəsində 10 illik fəaliyyətinin əsas istiqamətləri, görülmüş işlər barədə ətraflı məlumat verib.

Ombudsmanın insan hüquqları sahəsində beynəlxalq əməkdaşlığı diqqətə çatdırılıb. Müvəkkilin və əməkdaşlarının insan hüquqları üzrə 350-dək beynəlxalq konfransda iştirak etdiyi, BMT-nin İnsan Hüquqları üzrə Ali Komissarlığının rəsmi sənədləri sırasına Ombudsmanın 20-dən çox bəyanatının daxil edildiyi vurğulanıb.

İsmayıl Alper Coşqun Müvəkkilin insan hüquqlarının müdafiəsi sahəsində böyük təcrübəsinə Azərbaycandan kənarda da dəyər verildiyini diqqətə çatdırıb. Ölkəsində yenicə yaradılmış Ombudsman institutunun təşəkkülündə Azərbaycan Onbudsmanının köməyinin fayda verəcəyini bildirib. Səfir iki tərəf arasında səmərəli əməkdaşlıq əlaqələrinin genişləndirilməsini vacib sayıb. O, faydalı fikir və məlumat mübadiləsini yüksək qiymətləndirmiş, yeni seçilmiş Türkiyə Ombudsmanının Azərbaycan Ombudsman təsisatı ilə əməkdaşlıq edəcəyini bildirib.

E.Süleymanova Türkiyənin ölkəmizdəki səfirliyi ilə insan hüquqları sahəsində yaranmış səmərəli əlaqələrin bundan sonra da davamlı olacağına ümid bəslədiyini qeyd edib. O, yeni seçilmiş türkiyəli həmkarı ilə əməkdaşlıqda maraqlı olduğunu bildirib, tərəfdaşlığın daha da genişləndirilməsinin vacibliyini vurğulayıb.