Müəllimlərin işə qəbulu üzrə sənəd qəbulu başa çatdı

Ümumi təhsil və ilk peşə-ixtisas təhsili müəssisələrinə 2013-2014-cü tədris ilində müəllimlərin işə qəbul üzrə elektron ərizələrin qəbulu prosesi bu gün saat 18.00-da başa çatıb.

Bunu Lent.az-a açıqlamasında Təhsil Nazirliyinin Strateji Təhlil, Planlaşdırma və Kadrların İdarəolunması şöbəsinin müdiri Fərzəli Qədirov söyləyib.

Qeyd edək ki, elektron ərizə qəbulu 1-15 iyul tarixlərində aparılıb. 2013-2014-cü tədris ilində ümumi təhsil və ilk peşə-ixtisas təhsili müəssisələrinə vakant yerlərə müəllimlərin işə qəbulu üzrə test imtahanlarının keçirilmə vaxtı 21-23 iyul tarixlərində açıqlanacaq.

2013-2014-cü tədris ilində müəllimlərin işə qəbulu üzrə 3286 vakant yer müəyyənləşdirilib. Onlardan 2999-u Azərbaycan bölməsi, 187-si isə rus bölməsi üzrədir. Azərbaycan bölməsi üzrə ən çox vakant yer biologiya, kimya, coğrafiya, Azərbaycan dili və ədəbiyyatı, fizika, tarix, ingilis dili və informatika fənləri üzrədir. Rus bölməsi üzrə isə ən çox vakant yer ibtidai sinif müəllimi ixtisası üzrədir.