Metroda işləmək istəyənlər üçün pulsuz kurslar təşkil olunub

“Bakı Metropoliteni” Qapalı Səhmdar Cəmiyyəti qatarların qəbulu və yola salınması üzrə növbətçi peşəsi üçün növbəti ödənişsiz kurs elan edib.

"Bakı Metropoliteni"nin mətbuat xidmətinin rəhbəri Nəsimi Paşayevin Lent.az-a verdiyi məlumata görə, “Qatarın qəbulu və yola salınması üzrə növbətçi” peşəsi üzrə təşkil olunan ödənişsiz kurs 1 ay müddətində davam edəcək. Kursu müvəffəqiyyətlə bitirənlər “Bakı Metropoliteni” QSC-nin hərəkət xidmətində müvafiq peşə üzrə işlə təmin ediləcək.

Kursda iştirak edən xanımların yaş həddi 18-30 arası, boy isə minimum 170 sm olmalıdır. Kursa qəbul olunan xanımların orta təhsilli olması, Azərbaycan dilini əla səviyyədə bilməsi, Bakı şəhərində qeydiyyatda olmaları tələb olunur.

Kursa cəlb ediləcək oğlanlar üçün isə yaş həddi 22-30 arası, boy minimum 170 sm, hərbi mükəlləfiyyətli, təhsili texniki ali olmalıdır. Kursa müraciət edənlər Azərbaycan dilini mükəmməl bilməli, Bakı şəhərində qeydiyyatda olmalıdır.

Kursda iştirak etmək istəyənlər “Bakı Metropoliteni” Qapalı Səhmdar Cəmiyyətinin rəsmi veb-səhifəsinin “Karyera və əməkdaşlıq” bölməsinə daxil olub elektron müraciət formasını doldurmalıdır.

Anket doldurularkən “İşləmək istədiyiniz işin adı” xanasına “Qatarın qəbulu və yola salınması üzrə növbətçi” peşəsinin qeyd edilməsi zəruridir.

Müraciət üçün son tarix 05.08.2016-cı il nəzərdə tutulub.