Həzi Aslanov anılıb

Yanvarın 22-də II Dünya müharibəsinin əfsanəvi sərkərdələrindən biri, Azərbaycan xalqının rəşadətli oğlu, iki dəfə Sovet İttifaqı Qəhrəmanı, tank qoşunları general-mayoru Həzi Aslanovun xatirəsi onun doğulduğu Lənkəran şəhərində təntənə ilə yad olunub.

APA-nın cənub bürosunun məlumatına görə, qəhrəmanın adını daşıyan Xatirə parkında baş tutan ümumxalq anım mərasimini giriş sözü ilə açan Lənkəran Şəhər İcra Hakimiyyəti başçısının müavini Vüsal Nəsirli məşhur sərkərdə Həzi Aslanovun Böyük Vətən Müharibəsində göstərdiyi misilsiz şücaətindən, qəhrəmanlıqlarından danışaraq, onun rəşadətinin bu gün də hamı üçün böyük fəxarət, qürur və and yeri olduğunu bildirib.

Tədbirdə Böyük Vətən Müharibəsinin veteranı, rayon Veteranlar Şurasının üzvü İsfəndiyar Bağırov, Azərbaycan Vətən Müharibəsi Veteranlar Birliyi cənub bölgəsinin sədri Əlisəfa Ağayev, “N” saylı hərbi hissənin əsgəri Nahid Əliyev və digərləri də çıxışlarında Həzi Aslanovun II Dünya Müharibəsinin ən bacarıqlı, ən qüdrətli sərkərdələrindən olduğunu, onun müharibədə keçdiyi mətin və mübariz döyüş yolunun bu günkü gənclərimizin hərbi vətənpərvərlik tərbiyəsi istiqamətində böyük önəm daşıyan həyat məktəbinə çevrildiyini vurğulayıblar.

Tədbirin sonunda şəhər 3, 4, 5 saylı və Sütəmurdov kənd orta məktəblərinin “Gənc Aslanovçu”ların ifasında “Həzi burada doğulub” adlı kompozisiya nümayiş etdirilib.