Əvvəlki illərdə buraxılış imtahanlarından “2” alanların nəzərinə

Tələbə Qəbulu üzrə Dövlət Komissiyası (TQDK) əvvəlki illərdə buraxılış imtahanlarından “2” qiyməti alan şagirdlərin biliyinin necə qiymətləndiriləcəyinə aydınlıq gətirib. TQDK-nın mətbuat xidmətindən Lent.az-a verilən məlumata görə, əvvəlki illərdə tam orta təhsil səviyyəsində buraxılış ilinin illik qiymətləri üzrə ən azı bir fəndən “2” almış və yaxud eksternat qaydasında bu il yekun qiymətləndirmədə iştirak etmək üçün təhsil aldıqları təhsil müəssisələrinə müraciət etmiş şəxslərin müvafiq fənn (fənlər) üzrə bilik və bacarıqları həmin təhsil müəssisələrində və ya təhsil müəssisələrinin tabe olduqları şəhər (rayon) təhsil şöbələrində yaradılan xüsusi komissiya tərəfindən yoxlanılır və qiymətləndirilir. Əvvəlki illərdə buraxılış ilinin illik qiymətləri üzrə ən azı bir fəndən “2” almış şəxslərin bilik və bacarıqlarının xüsusi komissiya tərəfindən yoxlanması və qiymətləndirilməsi yalnız illik qiyməti “2” olan fənn (fənlər) üzrə aparılır.

Eksternat qaydasında bu il yekun qiymətləndirmədə iştirak etmək istəyən şəxslərin bilik və bacarıqlarının xüsusi komissiya tərəfindən yoxlanması və qiymətləndirilməsi dövlət nümunəli təhsil sənədinə qiyməti yazılmalı olan bütün fənlər üzrə aparılır.

Qeyd edək ki, əvvəlki illərdə tam orta təhsil səviyyəsində buraxılış ilinin illik qiymətləri üzrə ən azı bir fəndən “2” alan şəxslərin fərdi məlumatları, buraxılışdan əvvəlki tədris ilinin illik qiymətləri, buraxılış ilinin illik qiymətləri və illik qiymətləri “2” olan fənn (fənlər) üzrə komissiya qiymətləri, həmçinin, eksternat qaydasında bu il yekun qiymətləndirmədə iştirak etmək istəyən şəxslərin fərdi məlumatları və müvafiq fənlər üzrə komissiya qiymətləri 01.05.2014-10.06.2014 aralığında “Şagird-məzun” sisteminə əlavə olunaraq təsdiq edilməlidir.