DBX dabaq xəstəliyinə görə vaksinasiyaya başladı

Azərbaycanda heyvanlar arasında xüsusi təhlükəli xəstəliklərə qarşı aparılan profilaktik tədbirlərin səmərəliliyini və effektivliyini təmin etmək məqsədi ilə Kənd Təsərrüfatı Nazirliyinin kollegiyası tərəfindən təsdiq edilmiş epizootik tədbirlər planına uyğun olaraq müayinə və peyvəndləmə işləri davam etdirilir. Kənd Təsərrüfatı Nazirliyi yanında Dövlət Baytarlıq Xidmətinin mətbuat xidmətinin rəhbəri Yolçu Xanvəlinin Lent.az-a verdiyi məlumata görə, hazırda ölkənin cənub zonasında, xüsusilə Astara, Lerik, Lənkəran, Masallı, Cəlilabad, Salyan, Neftçala, Biləsuvar, Saatlı, İmişli, Beyləqan, Füzuli və digər rayonlarda heyvanlar arasında xüsusi təhlükəli xəstəliklərdən olan dabağa qarşı vaksinasiya tədbirlərinə başlanılıb. Azərbaycanın digər bölgələrində də bu mühüm tədbirin qısa zamanda aparılması nəzərdə tutulur.

Kənd Təsərrüfatı Nazirliyi yanında Dövlət Baytarlıq Xidməti əhalinin və təsərrüfat sahiblərinin nəzərinə çatdırıb ki, heyvanlarda özbaşına müalicə, peyvəndləmə və digər tədbirlər aparılmamalı, heyvanlar baytarlıq-sanitariya tələblərinə cavab verən şəraitdə saxlanılmalıdır. Həmçinin heyvanların peyvəndləmə və müayinədən kənar qalmaması üçün sahə baytarlıq məntəqələri və baytarlıq idarələrinə müraciət etmələri tövsiyə edilir.

Qeyd edək ki, hazırda xüsusi təhlükəli xəstəliklərə görə respublikamızda epizootik vəziyyət sabitdir. Bu sabitliyi qoruyub saxlamaq üçün Kənd Təsərrüfatı Nazirliyi yanında Dövlət Baytarlıq Xidməti epizootik tədbirlər planında nəzərdə tutulan xəstəliklərin profilaktikası üçün peyvənd vasitələri ilə yerli baytarlıq idarələrini təmin etməklə lazımi nəzarəti tədbirlər həyata keçirir.