Balakən və Zaqatala rayonlarında məktəb və bağça istifadəyə verildi

Balakən və Zaqatala rayonlarında Fövqaladə Hallar Nazirliyi (FHN) tərəfindən inşa olunmuş sosial obyektlər istifadəyə verilib.

Balakən rayonunda müasir standartlara uyğun inşa olunmuş Katex kənd 1 saylı Körpələr evi - uşaq bağçasının, Zaqatalada isə Göyəm kənd tam orta məktəbinin açılışı olub. Sözügedən bağça ötən ilin mayında baş vermiş təbii fəlakət nəticəsində dağılaraq yararsız vəziyyətə düşüb. FHN tərəfindən tikilən 80 yerlik ikimərtəbəli bağça lazımi avadanlıqlarla təhciz olunub. Hazırda bağçada 35 uşaq tərbiyə alır ki, onların təlim tərbiyyəsi ilə 13 müəllim və tərbiyəçi məşğuldur.

APA TV-nin xəbərinə görə, rayonda qəzalı vəziyyətə düşən daha 4 bağça FHN tərəfindən yaxın vaxtlarda yenidən inşa olunacaq.

Zəlzələ nəticəsində qəzalı vəziyyətə düşən və Fövqəladə Hallar Nazirliyi tərəfindən tikilən daha bir təhsil ocağı Zaqatalada müəllim və şagirdlərin istifadəsinə verilib. Göyəm kəndindəki ikimərtəbəli məktəb binasının fənn kabinələri, komputer otağı, labaratoriya otaqları, akt və idman zalları, kitabxanası, tibb otağı var. Məktəb müasir istilik sistemi ilə də təhciz olunub. Məktəbin açılış mərasimində Fövqəladə Hallar Nazirliyi nümayəndəsi, məktəbin müəllim və şagird kollektivi iştirak edib.

Yaxın vaxtlarda rayonda daha 4 məktəb müəllim və şagirdlərin istifadəsinə veriləcək.