Aprel şəhidi Təbriz Musazadəyə aid layihənin təqdimatı keçirilib

Mayın 5-də “Rəvan” Gəncliyə Dəstək İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə həyata keçirdiyi “Şəhid Təbriz Musazadənin həyat və döyüş yolu barədə məlumatlandırma tədbirinin keçirilməsi” layihəsinin təqdimatını keçirib.

Lent.az-ın məlumatına görə, Yevlax rayon Yuxarı Qarxun kənd orta məktəbində tədbirdə çıxış edən “Rəvan” Gəncliyə Dəstək İctimai Birliyinin sədri Ramiz Cürənov layihə barədə məlumat verib. R. Cürənov deyib ki, layihənin məqsədi Azərbaycan Respublikasının Prezidenti, Ali Baş Komandan İlham Əliyevin Azərbaycan dövlətçiliyinin müdafiəsi və torpaqlarımızın azad edilməsi istiqamətində birmənalı və qətiyyətli fəaliyyətini təbliğ etmək, orta məktəb şagirdlərinin mayor Təbriz Musazadə kimi yaşaması və Vətəninə və xalqına bağlı gənclər kimi yetişməsinə töhfə verməkdir.

Yevlax rayon Yuxarı Qarxun kənd orta məktəbinin tərbiyəvi işlər üzrə direktor müavini Camal Bərxudarov “Rəvan” Gəncliyə Dəstək İctimai Birliyinin fəaliyyətini təqdir edib. C. Barxudarov qeyd edib ki, layihə çərçivəsində keçiriləcək tədbirlərdə şagirdlərə Azərbaycan Respublikasının Prezidenti, Ali Baş Komandan İlham Əliyevin Azərbaycan dövlətçiliyinin müdafiəsi və torpaqlarımızın azad edilməsi istiqamətində birmənalı və qətiyyətli fəaliyyəti və aprel döyüşlərində şəhid olmuş mayor Təbriz Musazadə barədə geniş məlumat veriləcək.