Rektor “ASAN xidmət”lə tanış oldu

Martın 14-də Türkiyə və Orta Şərq Dövlət İdarəçilik İnstitutunun (TODAİE) rektoru Eyyub İsbirin başçılıq etdiyi nümayəndə heyəti Bakı 1 saylı “ASAN xidmət” mərkəzinin fəaliyyəti ilə tanış olub. Xidmətdən Lent. az-a verilən məlumata görə, görüş zamanı dövlət agentliyinin sədri İnam Kərimov “ASAN xidmət” mərkəzlərinin yaradılması, məqsədləri, həyata keçirdiyi xidmət növləri, həmçinin gələcək planlar barədə geniş məlumat verib. O bildirib ki, “ASAN” xidmət ölkədə dövlət qulluqçusu - vətəndaş münasibətlərinin keyfiyyətcə yeni müstəviyə keçməsini təmin etmək məqsədilə yaradılıb.

Qonaqlar iki qardaş dövlət arasında həyata keçirilən uğurlu əməkdaşlıqdan söhbət açıblar. Yeni yaradılmış Dövlət Agentliyinin bu əməkdaşlıqda xüsusi yer tutacağına ümid etdiklərini bildiriblər. “ASAN xidmət” mərkəzində yaradılmış şəraitlə tanış olan qonaqlar əməkdaşların peşəkar yanaşmasını yüksək qiymətləndiriblər.

Görüşdə həmçinin Dövlət Agentliyinin elmi potensialının inkişafı ilə bağlı birgə layihələrin həyata keçirilməsinə dair fikir mübadiləsi aparılıb.