ADA-ya qəbul olmaq istəyənlər üçün şans

Dövlət İmtahan Mərkəzi “ADA” Universitetinin bakalavriat səviyyəsinə qəbul olmaq istəyənlərə müraciət edib.

DİM-dən Lent.az-a verilən məlumata görə, “ADA” Universitetinin bakalavriat səviyyəsinə qəbul DİM-in keçirdiyi qəbul imtahanlarının nəticələri və Beynəlxalq SAT imtahanının nəticəsi vasitəsilə keçirilir.

Universitetə qəbul üçün minimum bal tələbi qoyulmur. Azərbaycanda yerləşən ümumtəhsil məktəblərinin rus, ingilis və ya gürcü bölmələrini cari ildə bitirən, eləcə də ümumtəhsil məktəbini əvvəlki illərdə və ya xaricdə bitirən abituriyentlər “Azərbaycan dili” fənni üzrə qəbul imtahanında iştirak edərək “məqbul” qiyməti almalıdırlar. Bunun üçün onlar aprelin 10-dək dim.gov.az saytında “Abituriyentin elektron ərizəsi” formasını doldurarkən "test imtahanı verəcəyi dil" bölməsində rus dilini seçməlidirlər. “Azərbaycan dili” fənni üzrə keçiriləcək imtahanın tarixləri DİM-in saytında yerləşdirilib (http://dim.gov.az/news/events/2030/). 2016-cı ildə Azərbaycan dili fənni üzrə imtahandan "məqbul" alan abituriyentlər cari ildə bu imtahanda iştirak etmədən müsabiqəyə buraxılırlar. Azərbaycanda yerləşən ümumtəhsil məktəblərinin Azərbaycan bölməsini cari ildə bitirən abituriyentlər isə buraxılış imtahanında iştirak edərək Azərbaycan dili fənni üzrə minimal 15 bal toplamalıdırlar;

Sənəd qəbulu prosesi bitdikdən sonra “ADA” Universitetinin pedaqoji heyətindən ibarət komissiya tərəfindən müsahibə keçiriləcək.