Məleykə Abbaszadə: “Qəbul imtahanlarında çətin suallar ləğv olunmayacaq”

Lent.az-ın verdiyi məlumata görə, bunu Tələbə Qəbulu üzrə Dövlət Komissiyasının (TQDK) sədri Məleykə Abbaszadə söyləyib.

Məleykə Abbaszadə bu il bəzi ixtisas qruplarında imtahanlara müəyyən qruplar üzrə asan, bəzi qruplarda isə çətin suallar salınması ilə bağlı deyilənlərlə də razılaşmayıb. O bildirib ki, hazırlıq səviyyəsindən asılı olaraq hər hansı sual bir abituriyent üçün asan, digəri üçün isə çətin görünə bilər: “Biz ekspertlərin rəyinə əsasən fənlər üzrə sualları asan, orta səviyyəli və çətin olmaqla tərtib edirik. İmtahanlardan sonra isə suallara verilmiş cavablarla əlaqədar statistika təhlil olunur. Əgər statistik təhlil və ekspert rəyi üst-üstə düşürsə, bu halda sualların tərtibi ilə bağlı ekspert rəyinin obyektiv olduğu üzə çıxır. Sualların səviyyəsi abituriyentlərin rəyinə əsasən müəyyənləşdirilmir”.

TQDK sədri onu da qeyd edib ki, gələcəkdə də qəbul imtahanlarında fənlər üzrə çətin suallar salınmaqda davam edəcək: “Çünki elə ixtisaslar var ki, orada rəqabət yüksəkdir. Həmin ixtisaslarda 1-2 bal fərq həlledici rol oynayır. Bu halda çətin suallara cavablar abituriyentlər arasındakı rəqabətdə həlledici rol oynayır. Ona görə də çətin suallar ləğv olunmayacaq, gələcəkdə də qəbul imtahanlarına salınacaq”.

Ramiz