Məhəmməd İmanlı Tədris, Metodik Birləşmiş Şuraya assosiativ üzv seçilib

Hüquq elmləri doktoru, Bakı Dövlət Universitetinin cinayət hüququ kafedrasının professoru Məhəmməd İmanlı 7-10 sentyabr tarixlərində Şimali Arktik Federal Universitetində Tədris, Metodik Birləşmiş Şuranın növbəti yığıncağında iştirak edib.

Məhəmməd İmanlı Lent.az-a açıqlamasında deyib ki, Rusiyada fəaliyyət göstərən bütün universitetlərin hüquq fakültələrinin görkəmli hüquq alimlərinin iştirak etdiyi iclasda Cinayət Məcəlləsinin təkmilləşdirilməsi, cinayət və kriminologiya ilə bağlı yeni layihələrin hazırlanması ilə bağlı mühüm qərarlar qəbul edilib.

Cənubi Qafqaz respublikalarından dəvət olunan yeganə alim kimi bu yığıncaqda iştirak edən Məhəmməd İmanlı Tədris, Metodik Birləşmiş Şuraya assosiativ üzv qismində qəbul olunub. Şura hər il tədbirlərini müxtəlif məkanlarda keçirir: “Rusiyanın tanınmış, hüquq nəzəriyyəsinin nəhəng simaları qanunvericilik sahəsində Azərbaycanla əməkdaşlıq etmək niyyətindədirlər və birgə əməkdaşlıqla bağlı qərar qəbul olundu. Söhbət cinayət qanunvericiliyinin təkmilləşməsi, kriminologiya elminin yenidən işlənməsindən gedir. Çünki illər keçib, hüquqda elə maddələr, normalar var ki, köhnəlib və faktiki heç bir hüquqi əhəmiyyət daşımır. Onların yeniləşməsi, modernləşməsi lazımdır. Hesab edirəm ki, Tədris, Metodik Birləşmiş Şuranın assosiativ üzvü kimi fəaliyyət göstərmək, əməkdaşlıq etmək Azərbaycana ancaq xeyir gətirər”.

O bildirib ki, Mixail Vasilyeviç Lomonosovun anadan olmasının 300 illiyi ilə bağlı tədbir də keçirilib. Məhəmməd İmanlı dəvət aldığı bu tədbirə də qatılıb.