AHİK jurnalistlər arasında müsabiqə keçirir

Bu barədə Lent.az-a AHİK-dən bildirilib. Yığıncaqda «Azərbaycan Həmkarlar İttifaqlarının həyatından bəhs edən ən yaxşı yazı, tele-radio süjeti» respublika müsabiqəsinin təşkili və keçirilməsi haqqında qərar qəbul edilib. Müsabiqədə kütləvi informasiya vasitələrində ən azı 5 il müddətində fasiləsiz işləyən şəxslər iştirak edə bilərlər. Hər bir media nümayəndəsi yalnız bir material təqdim edə bilər. Qəzet və jurnal yazıları son bir ildə həftədə bir dəfədən az olmayaraq, nəşr edilən, Mətbuat Şurasının tərtib etdiyi «Qara siyahı»ya düşməyən mətbu orqanlarda dərc edilməlidir. Tələb olunan sənədlər sırasına jurnalistin əmək kitabçasının işlədiyi media orqanı tərəfindən təsdiq edilmiş surəti, şəxsi VÖEN surəti və şəxsi bank rekvizitləri daxildir.

Müsabiqənin iştirakçıları müsabiqə materiallarını yazılı və elektron media orqanlarında çap olunduqdan, televiziya və radioda efirə getdikdən sonra 2011-ci il dekabrın 25-dək AHİK-in elektron ünvanına ([email protected]), yazılı mətnlər CD-də, video süjetlər isə DVD-də olmaqla AHİK-ə (Bakı, AZ1005, Gənclər meydanı, 3) təqdim edilməlidir. Qəzet və jurnallarda çap olunmuş yazı A-3 formatlı qəzetin bir səhifəsi (11 min çap işarəsi) həcmində, televiziya və radioda efirə gedən süjet isə 4-5 dəqiqə həcmində olmalıdır. Müsabiqəyə təqdim olunmuş məqalələr və video süjetlər AHİK-də yaradılmış münsiflər heyəti tərəfindən 2012-ci ilin yanvar ayı ərzində qiymətləndiriləcək və müsabiqənin qalibləri müəyyən ediləcək.

Birinci yerə layiq görülən 3 nəfərin hər biri 1000 manat, ikinci yerə layiq görülən 8 nəfərin hər biri 500 manat, üçüncü yerə layiq görülən 10 nəfərin hər biri 300 manat pul və fəxri diplomla mükafatlandırılacaq.